Sista P a beg u tun dung d ting

A vivid account of one of Jay’s recent conversation, written as it was told, in the Jamaican dialect.

I recently had a conversation with someone who was concerned about the state of Jamaica mainly from the crime and economic front

Big man D ting tun up too much. Sista P a beg you, tun dung d ting. Lawd have mercy a wha we get inna wen we decide to vote out d green man dem and vote een dem yah ppl. If mi did know say a so dem did a go mek d ting tun up mi would a neva vote fi dem and mek mi people vote fi dem.

D labour man dem did mek we neva a eat food, but we could at least live een a peace n nah fi a worry but being one a d 4 dat get murda every day. Poopa Jeezus  we need u now more dan eva becuz tings caan gwan so fi much longer.

Mi bredda dis is d worst mi have ever seen tings inna Jamaica and mi nah tell u nuh lie, it bad, it caan get nuh worse.

Mi did tink seh wen dem send we Dudus and mash dung TG, dat, we woud a neva get back yah so, but d man dem neva did a pree d ting right. Mek a tell u sumptin and dis a real ting.

U c afta dem bomb up TG and d man dem get scared and run weh, u have man way all run go foreign mi a tell u cuz dem say yard get hot and babylon dem a get wicked iyah, so man go cool out.

U see after PNP win d man dem pree d ting fi a while and see seh d ting kinda tun dung, so dem start come out yah one by one. Not only dat d man dem start send back gun and bullet cuz when dem did ova so dem mek some more links.

D next ting a wan show u is a nuff pnp gunman get leggo ffrom prison from dem win, mi nuh know how dem get out but all mi no is dem deh pon d rd again and a tun up d ting. Hear d real ting. U see afta some a dem went a jail u have some odda man a try run d place, so wen d real man dem come back and d one dem dat did a try control tings see dat man and man start bend and rue and a so d war ting start up again.

U tink u see nuttin yet, a bare tings ago start gwan in other areas cuz nuh food nah run and man and man a get hungry.

Mi nah tell u nuh lie, mi nuh like how tings a run and d worst ting about it is no food nah run either. D man dem tek we fi fool, but is aright dem can fool some ppl sometime but dem caan fool all a we all d time.

Mi dun wid d politics ting me bredda , mi a try do mi own likkle ting and try eat a food cuz dem a user, d two a dem, but dem yah man yah worse.

Jay : So what do you think about the goat island project, do you believe that could help change life in Jamaica by providing a lot of jobs.

Response : Mi nuh know nuttin bout goat island and nuh hub ting, d way me see it , is another ting fi fool up poor people mek dem tink seh dem a look out fi we and gee we jobs. U see mi bredda, dem ppl yah master how we tink, dem no say we want work so dem we come wid all kinda a ting say dem a gee we work but soon u nuh see or hear from dem again.

Look pon JEEP, wen last u hear anything bout dat, dat dead so dem haffi come up wid something else fi mek it look like seh dem business we wid, but dem nuh give a F$k about we, Sorry bout that but mi bend iyah.

Yahso is a nice place eno, but d man dem f@#k it up and mi nuh mean one a dem, me mean d two a dem dweet.

Jay: So what you think about the Audley , Holness leadership race.

Response : Big man mi nuh want get inna d green man dem ting eno dat a fi dem ting, dem betta than mi and you. Mi nah really a pree dem still , but from d likkle we mi hear a pure war ago gwan from now to election day. Dem ppl deh nuh ready yet dem always a war wid each oda and dem nuh seem fi know wha clock a strike.

Wha me can seh still, is if Audley win then dem we gee Portia  good fight but if a Holness then we know seh comrades ago dust dem out again.

Mi wan good fi d country eno, mi born n grow PNP and mi nah switch fi nuttin, but right yah now nuttin nah gwan iyah, but mi jus hope and pray seh dem sort out d ting fast.

Respeck mi bredda link mi up again so mi caan tell u more.

Oh before I go a hear sey a man inna d green house box dung im lady wah day. D way me hear it go is d man went go go club and im wife start get vex pon im, when she find out . Mi hear say d bredda shot har a box and she flat out pon d floor.

Jay : How could you have heard that, when that would have been a private thing and would have occurred inside their house.

Yow me nah see nuttin more, u go pree dat and see if nuttin go so and who me chat bout.

I wonder … ?